Աստուծոյ Ծառայ ''Օտոարտօ ֆոքերինիի'' Երանացումը` Աշխարհական Ու Նահատակ:
Կարտինալ Անճելօ Ամադօ` կառավարիչը սուրբերու դատի ժողովին, շաբաթ 15 յունիս 2013-ի առաւօտեան,
յանուն ֆրանչիսկոս Քահանայապետին, Գաբրիի մէջ գլխաւորեց երանացման արարողութիւնը աշխարհական
ու նահատակ Աստուծոյ ծառայ Օտոարտօ ֆոքերինիի։ Օտոարտօ ֆոքերինիի ծնած էր Գաբրի քաղաք`
6 յունիս 1907-ին։ Կաթողիկէ ընտանիքի զաւակ, փոքր հասակին մաս կը կազմէ եկեղեցական եղբայրակցութեան,
օգնութեան հասնելով կարօտեալներուն ու կարիքաւորներուն։ 1927-ին կը դառնայ թղթակից` Գաբրի
թեմի առօրեայ թերթին, ապա թղթակից Իտալիոյ եպիսկոպոսական համահաւաք դասի Ավվենիրէ օրաթերթին
եւ Վատիկանի Օսսերավաթորէ Րոմանօ կիրակնօրեայ թերթին։ 1930-ին կը պսակուի Մարիա Մարքեզիին
հետ եւ կ'ունենայ 7 զաւակներ։ 1936-ին կը դառնայ նախագահը կաթողիկէ բանուորական կազմակերպութեան։
1942-ին ան կը սկսի պաշտպանը հանդիսանալ նացիականներու ու ֆաշիստներու կողմէ հալածուած
հրեաներուն ։ Յուլիս 1944ին կը ձերբակալուի Պոլոնիա քաղաքին մէջ եւ 7 սեպտեմբերին Գերմանիա
կ'ուղարկուի, ուր կը նահատակուի 27 դեկտեմբեր 1944-ին։ Անոր յետմահու
ստացած գնահատական ճանաչումներէն են. Իտալիոյ հրեաներու ոսկիէ մետալը 1955-ին։ 1969-ին
Երուսաղէմի իշխանութեան կողմէ ''Արդարը մարդոց միջեւ'' ճանաչումը եւ 2007ին Իտալական
կառավարութիւնը շնորհած ''քաղաքացիական արժանիք'' ոսկեայ մետալը։